Казанда Галимҗан Баруди кичәсе әзерләнә

21 декабрьдә башкалабызның “Юность” мәдәният йортында (Химиклар урамы, 11) Әлмәт шәһәре һәм Әлмәт районы мөхтәсибәте татар дин эшлеклесе, мөфти Галимҗан Баруди елы уңаеннан “Галимҗан Баруди истә” дип исемләнгән әдәби-музыкаль кичә оештыра. Әлеге чара барышында вәгазьләр укылачак, Галимҗан Баруди турында фильм күрсәтеләчәк, күренекле галимнең тормыш юлы сөйләнеләчәк, Әлмәт мәдрәсәсе шәкертләре тарафыннан театральләштерелгән өзек тәкъдим ителәчәк, Галимҗан Барудиның туганнары белән күрешү оештырылачак, мөнәҗәтләр әйтеләчәк. Әлеге кичәгә теләге булган һәркем чакырыла, керү түләүсез, билетлар саны чикле. Башлана 18.00 сәгатьтә.