Бүген Татарстан мөфтие Камил хәзрәт Сәмигуллин "Изге Хачны Күтәрү" рим-католик приходының настоятеле Андрей Старцев белән очрашты. Диния нәзарәтендә узган очрашу барышында мөфти Камил хәзрәт католикларның яңа руханиенә Галиев мәчете комплексын күрсәтте, аның кыскача тарихын сөйләде һәм нәзарәт буенча экскурсия үткәрде.
Очрашу кысаларында ике як киләчәктә хезмәттәшлек итү юлларын барлады. Аерым алганда, мөфти хәзрәтләре Андрей Старцев атакайга рим-католик приходының элеккеге настоятеле Диогенес Уркиза белән тыгыз элемтәләр урнаштырылуын, католиклар делегациясенең изге Рамазан айларында мөселманнар белән уртак чараларда катнашуын сөйләде һәм киләчәктә моңа хәтле урнашкан күркәм конфессияара мөнәсәбәтләр дәвам итәр дигән өмет белдерде.
Камил хәзрәт нәзарәт кунагына үзенең яңа китабын да бүләк итте.
