Азнакай мөхтәсибәте мәчетләрендә Мәүлид кичәләре гөрли

Азнакай мөхтәсибәте мәчетләре дә Мәүлид чараларыннан читтә калмады. Беренче Мәүлид кичәсе Ак мәчеттә 9 декабрь көнне узды һәм бу эстафетаны авыл мәчетләре дәвам итте.12 декабрьдә исә Азнакай нуры мәчетендә хакимият вәкилләре катнашында бик матур бәйрәм кичәсе гөрләде.
Кичәне сәламләү сүзләре белән Азакай районы мөхтәсибе Азат хәзрәт Талибуллин ачып җибәрде. Бәйрәмгә җыелган халыкны Азнакай муниципаль районы башлыгы урынбасары Айдар Шамсутдинов та тәбрикләде.
Ир-атлар тәкбир әйтеп, Коръән укып бәйрәмне дәвам иттеләр. Апаларыбыз исә халкыбызга хас моң белән бик матур итеп салаватлар әйттеләр, мөнәҗәтләр җырладылар.
Мәүлид кичәләре пәйгамбәребез Мөхәммәд сәләллаһу галәйхи вәссәләмне искә алып, аның күркәм холкы, изге гамәлләре турында бәян итүче, халкыбызның матур гореф-гадәтләрен искә төшерүче чара булып, еллар буе милләтебезне яктылыкка илтүче матур традиция булып саклана.