29 декабрьдә Буа мөхтәсибәтенең Хаҗилар мәчетендә имамнар җыелышы булды. Җыелыш Буа муниципаль районы башкарма комитеты җитәкчесе Даутов Сәлим Фәһимович, Буа имам-мөхтәсибе Илмир хәзрәт Хәсәнов һәм имамнар катнашуында үтте. Сәлим әфәнде имамнарны районда булган кайбер вакыйгалар белән таныштырды, Буа районында имамнарның абруе зур икәнлеген әйтеп үтте. Җыелышта имам-мөхтәсиб Илмир хәзрәт Хәсәнов имамнарга 2016 елга хисап тотты. Үткән чараларның никадәр әһәмиятле булуы турында сөйләде. Декабрь аенда булып үткән гомер бәйрәмнәре белән котлап, мөхтәсибәт исеменнән бүләкләр, рәхмәт хатлары тапшырды. Мөхтәсибәт каршында оешкан аксакаллар рәисе Кадим хәзрәт Мөбәрәкшин имамнарны 2016 елда эшләгән эшләре белән һәм 2017 елга эш планы белән таныштырды. Мөхтәсибәттә эшләгән бүлек мөдирләре үзләренең бүлекләре буенча имамнар каршында хисап тотты. Хәзрәтләр яңа айга намаз вакыты, мөхтәсибәт тарафыннан әзерләнгән бер елга Буа шәһәре мәчетләре төшкән календарь һәм “Шура” альманахының 15 санын алып мәхәлләренә таралдылар.
