11 нче сентябрьдә Мәскәүдә “Россия һәм Иран гаилә һәм социомәдәни тормышында хатын-кызларның роле” дип исемләнгән халыкара конференция узды. Конференциядә зур игътибар Россиядә дәүләт гаилә сәясәтенең практик тормышка ашырылуы юлларына, Россия Федерациясендә хатын-кызларның хәлен яхшырту өлкәсендә иҗтимагый оешмаларның роле, Иранда эшләүче хатын-кыз оешмаларының эшчәнлеге һәм аларның эш нәтиҗәләренә бирелде. Утырышлар РФ Иҗтимагый палатасында барды, аны “Святость материнства” Бөтенроссия программасының Попечительләр шурасы рәисе Наталья Якунина алып барды. Икенче утырыш РФ Дәүләт Думасы рәисе урынбасары Ольга Епифанова җитәкчелегендә Дәүләт Думасында узды. Россиякүләм иҗтимагый оешма рәисе Наилә Җиһаншина Россия мөслимәләренең гаилә һәм социомәдәни өлкәләрдә башкарган роле турында сөйләде.
