Бүген Татарстан мөфтие Камил хәзрәт Сәмигуллин Татарстан Республикасының Санкт-Петербург һәм Ленинград өлкәсендәге даими вәкиле Ренат Нәкыйф улы Вәлиуллин белән очрашты. Ренат әфәнде һәм Камил хәзрәт Татарстан мөфтияте белән вәкиллек арасында элемтәләрне ныгыту турында сөйләштеләр. Эшлекле мөнәсәбәтләрнең яңа этабында алгы планга татар телен саклау һәм өйрәтү өлкәсендәге мәсьәләләр чыгачак. Камил хәзрәт шулай ук Петербуг татар милли-мәдәни үзәге эшчәнлеге белән танышты. "Мондый үзәкләр милли мәдәниятебезне, үзаңыбызны саклауда әһәмиятле роль уйныйлар", - дип бәяләде ул һәм ватандашларга Диния нәзарәтенең “Хозур” нәшрият йорты нәшер иткән китаплар белән тәэмин итәчәге турында хәбәр итте. Бүгенге көндә төньяк башкалада татар телен өйрәтү буенча ике курс эшли.
