Татарстанның рәсми хаҗ операторы “ДУМ РТ Хаҗ” җитәкчесе Ранис хәзрәт Вахитов хәзер эш сәфәре белән Согуд Гарәбстанында, ул 2018 елда хаҗ оештыру мәсьәләләре буенча эшче төркем киңәшмәләрендә һәм әлеге илдә хөкүмәт дәрәҗәсендә уза торган утырышларда катнаша. Мисал өчен, Россиянең хаҗ-миссиясе рәсми сөйләшүләрендә Согуд Гарәбстаны министры Мөхәммәд Салих бин Таһир Бинтан белән Мәккәдә хаҗ вакытында хаҗиларга хезмәт күрсәтү һәм Согуд Гарәбстаны Корольлегенең хаҗ министрлыгының электрон системасы аша гадиләштерелгән схема буенча виза алу мөмкинлеге каралды. “ДУМ РТ Хаҗ” җитәкчесенең сәфәре барышында шулай ук кунакханә һәм хезмәт күрсәтүче компанияләрнең җитәкчеләре белән очрашулар каралган. Моннан тыш, хаҗиларны тукландыруны оештыру буенча җирле ашханәләр белән сөйләшүләр алып бару планлаштырыла.
