Истанбулда бүген “Кодус – мөкатдәс шәһәр” темасына багышланган халыкара конференция үтте. Әлеге чарада Төркиянең вице-премьеры, хөкүмәтнең матбугат сәркатибе Бәкир Боздаг, Төрек Республикасының дин эшләре буенча Идарәсе рәисе Әли Әрбаш, Кавказ мөселманнары Идарәсе рәисе шәйхелислам Аллаһшөкер Пашазадә, Гыйрактан, Филистыйннан, Пакьстаннан, Һиндстаннан, Үзбәкстаннан, Индонезиядән һәм башка мөселман илләреннән килгән дини лидерлар, сәясәтчеләр, фән эшлеклеләре катнашты. Катнашучылар арасында Татарстан мөфтие Камил хәзрәт Сәмигуллин да бар иде. Төрек телеканалына биргән әңгәмәсендә Камил хәзрәт ассызыклаганча, Кодустагы Әл-Акса мәчете – Исламның төп символларының берсе. Ул мөселманнар бердәмлегенең әһәмиятен искә төшерде. Коръәндә дә әйтелә: “Мөселманнар – бер-берләренә кардәш”.
