Африка илләренең берсендә – төп халкын мөселманнар тәшкил итүче Нигерда биш кое эшләнгән, алар берничә җирле авылларны эчәргә яраклы су белән тәэмин итә. Әлеге башлангыч сусызлыкка тилмерүчеләрне аңлап, бу хәлгә битараф булмаган Россия мөселманнары – Halalstarter @halalstarter проекты волонтёрлары тарафыннан Россия Вакыф фонды ярдәме һәм Рәсүл Тавдиряков тырышлыгы белән тормышка ашырылган. Әлеге авыл җирлекләре ярымчүлле климатик шартларда урнашканнар һәм аларда медицина, электр уты һәм су белән тәэмин ителеш юк: биредәге кешеләр үзләренең яшәү урыннарына су алып килү өчен берничә сәгать вакытларын сарыф итәләр. Үз яннарында коелар казып ачу алар өчен зур шатлык. Шунысы игътибарга лаек, биш кое татар ислам галимнәренең исемнәре белән аталган: Галимҗан Баруди, Шиһабетдин Мәрҗани, Габденнасыйр Курсави, Ризаэддин Фәхреддин һәм имам Шамил. Инициатив төркемдә аңлатуларынча, “аларның бар тормышы һәм эшчәнлеге татар халкы өчен яшәү көче чыганагы кебек булган”.
