Бүген Татарстан мөфтие Камил хәзрәт Сәмигуллин Палестинаның милли администрациясе каршындагы Россия Миссиясе башлыгы Айдар Рәшид улы Аганин белән күреште. Очрашу барышында Камил хәзрәт кунакны Татарстан мөфтияте, “Хузур-ТВ” телеканалы, “ДУМ РТ Хаҗ” оешмалары эшчәнлеге белән таныштырды, киләчәктә хезмәттәшлек алып бару турында сөйләшү узды. Ике як Иерусалимдагы “Әл-Әкъса” мәчетенең тарихын, әһәмиятен кардәшләребезгә җиткерү турында сүз алып барды. Камил хәзрәт Сәмигуллин шулай ук Палестинада килеп чыккан аяныч хәлләргә карата үз фикерен белдерде. “40 кешенең үлеменә китергән сәяси карарларны тәнкыйтьләп, һичшиксез, бөтен дөнья җәмәгатьчелеге чыгарга тиеш. Аллаһы Тәгалә барлык халыкларга тыныч һәм имин көннәр җибәрсен”, – дип теләде Татарстан мөфтие.
