19 майда Бөгелмә шәһәре һәм Бөгелмә районы мөхтәсибәте физик мөмкинлекләре чикле балалар өчен Бөгелмә шәһәре Үзәк мәчетендә беренче тапкыр ачык ишекләр көне үткәрде. Әлеге чара Татарстан Республикасының “Бергә булдырабыз” проектлары кысаларында узды. Кунакларны кызыклы һәм мавыктыргыч программа сөендерде: мәчет буйлап экскурсия үткәрделәр, мөхтәсибәтнең эшчәнлеге турында сөйләделәр, яулык бәйләү, сыерчык оясы һәм мехенди ясау буенча мастер-класс күрсәттеләр, толерантлык һәм мөселманнарның бердәмлеге темасына вәгазь укыдылар. Ачык ишекләр көнен мәчеткә йөрүчеләр белән бергә үткәрелгән хәйрия кичке ашы (ифтар) төгәлләде.
