“Зәкят” фонды инвалид качакларны махсус транспорт белән хастаханәләргә илтүне оештыра

Татарстан мөфтиятенең “Зәкят” хәйрия фонды Донецк һәм Лугансктан Казанга килеп урнашкан качакларны Казан шәһәренең хастаханәләргенә алып барып кайтуны оештыра. Качаклар арасында физик мөмкинлекләре чикләнгән кешеләр, коляскалы авыруларны илтеп-кайтарып кую өчен Фондның махсус җиһазландырылган транспорт чарасы файдаланыла. Әлеге мөмкинлектән файдаланып, качаклар медосмотр үтә, анализлар тапшыра, табибларга күренә. Машина белән хастаханәләргә йөрү ихтыяҗдан чыгып киләсе атналарда да дәвам итәчәк. Исегезгә төшерәбез, моңа кадәр “Зәкят” хәйрия фонды Казан кунакханәләренә тукталган качакларга көндәлек кирәк-яраклар, шәхси гигиена һәм көнкүреш химиясе әйберләре, мәктәп балаларына уку кирәк-яраклары тапшыруны оештырган иде.