Бүген, Рамазан аеның 26нчы көнендә (26нчы мартта), Татарстан Мөфтие Камил хәзрәт Сәмигуллин Дагыстанда Республикакүләм ифтарда катнашты. Ул Каспийск шәһәрендә Али Алиев исемендәге Спорт сараенда узды. Мөфти белән ифтарга шулай ук “Туган авылым” милли-туристик комплексы җитәкчеләренең берсе Радик Абдрахманов та килде.
Ифтар Дагыстан Республикасы Башлыгы Сергей Меликов исеменнән оештырылды.
Әлеге чарада 5000гә якын кеше катнашты.
Шәрәфле кунаклар арасында Россиянең күренекле дин әһелләре, шул исәптән Дагыстан Мөфтие, шәех Әхмәд Әфәнде, Россия мөселманнары Дини җыены башлыгы Әлбир Крганов, шулай ук Донецк Халык Республикасы һәм Луганск Халык Республикасы Мөфтиләре Рәшид Брагин һәм Мөхәммәд Гамбаров бар иде.
Әлеге чара барышында 20 кешегә гомрәгә юллама алу бәхете елмайды.
“Правительство Дагестана” Telegram-каналы фотолары файдаланылды.
