Бүген, Рабигыль-әүвәл аеның 6нчы көнендә (29нчы августта), Казанда Мөхәммәд пәйгамбәрнең ﷺ туган көненә багышланган шәһәркүләм Мәүлид бәйрәме узды. Быел тантана бөек юбилей – һиҗри буенча Аллаһ Илчесенең ﷺ 1500 еллыгы белән истәлекле. Шуңа күрә Диния нәзарәте беренче тапкыр республика җитәкчелеге, ТР Мәдәният министрлыгы һәм Казан шәһәре Башкарма комитетының “Иске шәһәр” Префектурасы ярдәмендә аны аеруча зур итеп һәм Республика көне чаралары кысаларында оештырды. Зурлап үткәрелгән әлеге бәйрәмдә теләгән һәркем: казанлылар һәм башкала кунаклары катнашты.
Шәһәркүләм Мәүлид ән-Нәби Казанда Иске Татар бистәсендә татар дин галиме Ш.Мәрҗани һәйкәле янында үтте. Бәйрәмне Изге Коръән аятьләрен укып шәех Мәэмүн әр-Рави (ул Коръән хифзы буенча 10 кыйраәт белгече, Фарсы култыгы илләрендә Коръән буенча бәйгеләрдә баш хөкемдар һәм жюри рәисе, пәйгамбәребез Мөхәммәднең ﷺ нәсел дәвамчысы, Казанда кулъязма Коръән әзерләү буенча комиссия әгъзасы) ачып җибәрде. Аннары Татарстан Мөфтие Камил хәзрәт Сәмигуллин кунакларны сәламләде.
Аннары Татарстан Мөфтие Камил хәзрәт Сәмигуллин катнашучыларны сәламләде. Ул үз чыгышында билгеләп үткәнчә, сөекле Пәйгамбәребез Мөхәммәднең ﷺ бу дөньяга килүе – Аллаһның олуг бүләге. Мөфти хәзрәт: “Әнбия” сүрәсендә: “Ий Мөхәммәд, без сине галәмнәргә рәхмәт буларак җибәрдек”, – диелә. Шуңа күрә мөселманнар Мәүлидкә, һичшиксез, шатланырга тиеш була. Мәүлидкә кем сөенмәгән? Хәдисләрдән хәтерләсәгез, Иблис өч тапкыр бик каты кычкырган: җәннәттән куылгач, мәлгунь булганга күрә һәм Пәйгамбәребез ﷺ дөньяга килгәч. Ягъни Мәүлидтән җир шарында иң беренче Иблис һәм аның иярченнәре рәхмәтсез булган.
Пәйгамбәребез ﷺ һәр дүшәмбе саен гыйбадәт белән туган көнен билгеләгән һәм безгә дә кушкан. Димәк, ул бу көнне, елга бер тапкыр түгел, атна саен ассызыклап күрсәткән.
Алга таба Мөфти хәтта Пәйгамбәрнең ﷺ абыйсы Әбу Ләхәбнең Җәһәннәмдә дүшәмбе саен газабы җиңеләйтеләчәге хакында искәртте. Чөнки ул үз вакытында Мөхәммәднең ﷺ тууына шатланган, аңа бу хәбәрне китергән Сүвәйбәне азат иткән һәм корбан чалдырган. “Бер динсезнең дә, Пәйгамбәр Мөхәммәднең ﷺ тууына шатланып, Мәүлидтән файда күргәч, мөселманнарга Мәүлиднең нинди зыяны турында сөйләп була?” – диде Камил хәзрәт. Ул шулай ук бу ай дәвамында Пәйгамбәрнең ﷺ тормыш юлы турында китаплар укырга һәм аның сөннәтенә иярергә өндәде.
Мәүлид бәйрәмендә катнашучылар арасында Татарстан Рәисе Рөстәм Миңнеханов та бар иде. Ул катнашучыларны сәламләп, изге Мәүлид ае белән тәбрикләде һәм сөекле Рәсүлебезнең ﷺ туган көненә җыелучыларга рәхмәт сүзләрен җиткерде.
Мәүлидтә катнашучылар өчен иң көтеп алынган мизгел булып хаҗга һәм гомрәгә юлламалар уйнату булды. Татарстан Рәисе Рөстәм Миңнеханов ярдәме белән бәйрәмдә “ДУМ РТ Хаҗ” операторыннан 2026нчы елда хаҗ кылу өчен 2 юллама уйнатылды. Шулай ук Татарстан Республикасы Рәисе каршындагы Мәдәниятне үстерүгә ярдәм фонды гомрә кылу өчен “ДУМ РТ Хаҗ” операторыннан ике юллама бирде. Моннан тыш, чараның партнерлары сыйфатында Дагыстан Республикасы мөфтияте һәм Дагыстанның Татарстандагы Тулы вәкаләтле вәкиллеге гомрәгә тагын өч юллама бирде. Шулай итеп, бәйрәмдә олы һәм кече хаҗга юлламалар алу өчен барлыгы җиде сертификат тапшырылды. Бүләк уйнатуда Мәүлидкә килгән 4 мең мөселман катнашты – бәйрәмгә шуның кадәр билет өләшкәннәр иде.
Мәүлидне оештыручылар төрле яшьтәгеләр өчен бай дини-мәгърифәтчелек программасы әзерләде. Фестивальнең махсус кунаклары буларак Россиядә иң танылган нәшид башкаручы “Нәшидүл ислам” төркеме җырчылары чыгыш ясады. Алар үзләренең иң популяр нәшидләрен – сөекле Рәсүлебез ﷺ һәм Аллаһы Тәгаләгә мәхәббәт турында җырларын тәкъдим итте. Шулай ук бәйрәм сәхнәсендә Мәүлид турында театральләштерелгән тамаша күрсәтелде, халык яраткан хәзрәтләр – Мөфтинең беренче урынбасары Илфар хәзрәт Хәсәнов, Тукай районы имам-мөхтәсибе Инсаф хәзрәт Сәүбәнов, Мөфти урынбасары Равил хәзрәт Зөфәров вәгазьләр сөйләде, ә танылган татар артистлары Ильяс Халиков һәм Динар Шәймәрданов танылган Мәүлид касыйдәсен башкарды. Артистлар Миңгол Галиев, Марсель Вәгыйзов, Гөлназ Гафурова, Ришат Шәяхмәтов, Казан балалар филармониясе, “Мәрҗән”, “Сөембикә” коллективлары дини кануннар кысаларында үзләренең иҗади номерлары белән чыгыш ясады. Балалар өчен викториналар узды: аларга бүләкләр бирелде.
Шулай ук Мәүлид мәйданчыкларында Halal Market ярминкәсе эшләде. Моннан тыш, бәйрәм кысаларында Татарстан мөфтиятенең “Зәкят” хәйрия фонды аз керемле, күп балалы, тулы булмаган гаиләләрдә тәрбияләнүче 200 укучыга портфельләр тапшырды. Бу акция быел унынчы тапкыр узды.
Мөселман календарендәге иң күркәм айларның берсе – халыкта Мәүлид дип йөртелүче Рабигыль-әүвәл ае 2025нче елның 23нче августында кояш баю белән башланды һәм ул 22нче сентябрьгә кадәр дәвам итәчәк. Ул Аллаһның соңгы Илчесе, сөекле Пәйгамбәребез Мөхәммәд ﷺ туган ай булу белән истәлекле. “Мәүлид” сүзе, гарәп теленнән тәрҗемә иткәндә, “туу” дигәнне аңлата, ә “Мәүлид ән-Нәби” – Мөхәммәд пәйгамбәрнең ﷺ дөньяга килүе. Мәүлидне Рабигыль-әүвәл ае дәвамында үткәрү гадәткә кергән. Бу уңайдан Татарстан мөхтәсибәтләрендә Мәүлид кичәләре узачак. Иң беренче чара Рабигыль-әүвәл аеның беренче көнендә (24нче августта) Кукмара районының тарихи Мәчкәрә мәчетендә узды. Анда республика дин әһелләре катнашты. Ә Рабигыль-әүвәл аеның 12нче көнендә (4нче сентябрьдә) – Пәйгамбәрнең ﷺ нәкъ туган көнендә Мәүлид кичәсе Болгарда Ак мәчеттә узачак.
