Бүген, җөмәдәл-әүвәл аеның 2нче көнендә (24нче октябрьдә), Татарстан мөфтиятенең “Зәкят” хәйрия фонды 50 мохтаҗ гаиләгә азык-төлек җыелмалары таратты.
Хәйрия фондыннан әлеге ярдәмне бер ялгызы балалар үстерүче аналар, күп балалы гаиләләр, ялгыз пенсионерлар, авыру мохтаҗлар, инвалид бала тәрбияләүче гаиләләр алды.
Һәр азык-төлек җыелмасына он, ярмалар, көнбагыш мае, шикәр, тушенка, токмач, чәй, печенье, шоколад кебек иң кирәкле ризыклар кертелгән.
Фонд тарафыннан азык-төлек җыелмалары дин кардәшләребез күрсәткән сәдакалар, битараф булмаган кешеләрнең матди ярдәмнәре белән әзерләнде. Мохтаҗларны һәм инвалидларны сөендерү алдагы атналарда да дәвам итәчәк.
Әлеге акциядә катнашу өчен әлеге сылтама буенча узарга кирәк.
Безнең сөекле Пәйгамбәребез Мөхәммәд ﷺ болай дигән: «Яшермә, юкса Аллаһы Тәгалә сиңа бирергә мөмкин нәрсәләрне синнән яшерер, мөмкинлегеңә карап, Аллаһы юлында сарыф ит».
Аллаһы Тәгалә изге эшләрегезне кабуллардан кылсын!
