Сабада мөселман яшьләре очрашты

Саба җәмигъ мәчетендә республика мөселман яшьләренең «Яшьләр дулкыны» дип исемләнгән чарасы уздырылды. Анда Яшел Үзән, Кама Тамагы, Арча, Кукмара районыннан, Казан шәһәреннән дөньяви һәм дини уку йортларында белем алучы кызлар һәм егетләр катнашты. Яшьләр белән Саба мәчетендә интеллектуаль уен үткәрелде, ял программасында шулай ук кышкы һавада чаңгыда йөрү, Лесхозның боз сараенда тимераякта шуу, Иләбәр авылы мәчете биләмәсендә балалар өчен дини викторина үткәрү кебек чаралар бар иде. Кыскасы, кунакларыбыз Саба җирлегендә яшьтәшләре белән аралаштылар, иң мөһиме мөселман яшьләрен ничек туплау, изге гамәлләргә җәлеп итү буенча фикер алыштылар, киләчәккә матур максатлар билгеләделәр.