Саба районында мөселманча сабантуе узды. Гадәти бәйрәмнән аермалы буларак, бу чара ислам кануннары кысаларында үткәрелде: хәмер эчемлекләр һәм хәләл булмаган ашамлыклар тыелды. Программага традицион милли уеннар, спорт ярышлары, викториналар кертелде, балалар өчен махсус аерым чаралар үткәрелде. Кунаклар, алар арасында Татарстан мөфтие Камил хәзрәт Сәмигуллин һәм Саба районы башлыгы Рәис Миңнеханов та бар иде, бәйрәмдә катнашучыларга быелгы уңышның бай булуын теләделәр.
- Миңа калса, татар халкының бу асыл бәйрәме нәкъ шулай узарга тиеш: миллилекне саклап, саф туган телдә, иң матур гореф-гадәтләрне чагылдырып, хәмерсез һәм хәрәмсез. Татарча сабантуй шундый була! - дип белдерде мөфти хәзрәт.
