Диния нәзарәтеннән рәсми хәбәр

Казан югары танк училищесында ислам дине нигезләре буенча дәресләр турында дөрес булмаган, чынбарлыкка туры килмәгән фактлар массакүләм мәгълүмат чараларында чыгу уңаеннан хәбәр бирәбез: ислам дине нигезләре һәм әхлак буенча дәресләр училищеда хәрби хезмәт үтүчеләр өчен мәҗбүри түгел, ә барлык теләүчеләр өчен дә ирекле. Төрле конфессия вәкилләре белән рухи әңгәмәләр үткәрү яшьләр арасында экстремизм күренешләрен кисәтү эше алып барырга, шулай ук рухи-әхлакый башлангыч һәм патриотик кыйммәтләр тәрбияләргә ярдәм итә.