Бүген Татарстан Диния нәзарәте резиденциясенә Франциянең Россиядәге илчесе Сильви Берманн җитәкчелегендәге делегация килде. Кунакларны бигрәк тә республикабызда гомер итүче милләтләр һәм диннәр арасындагы уңай мөнәсәбәтләр, шулай ук Татарстан мөфтиятенең православие һәм яһүд руханилары белән конфессиональ элемтәләр алып бару мәсьәләләре кызыксындырды. Татарстан мөфтие Камил хәзрәт Сәмигуллин әлеге өлкәдә актив эш алып барылуы турында сөйләде, шулай ук кунакларны Татарстандагы дини мәгариф системасы, Болгар ислам академиясе ачылышы белән таныштырды, татар дини мирасы һәм Коръән-хафизлар мәктәбе торгызылуы турында әйтте.
